मुंबई : राज्यातील शेतकऱ्यांना दिलासा देणारी मोठी घोषणा मुख्यमंत्री देवेंद्र फडणवीस यांनी केली आहे. साडेसात हॉर्सपॉवरपर्यंतच्या कृषिपंपधारकांच्या नावावर असलेली सुमारे ४८ हजार कोटी रुपयांची जुनी थकीत वीजबिले माफ करण्याचा निर्णय राज्य सरकारने घेतल्याचे मुख्यमंत्र्यांनी सांगितले आहे. या निर्णयामुळे राज्यातील कृषिपंपधारक शेतकऱ्यांना मोठा आर्थिक दिलासा मिळण्याची अपेक्षा आहे. शेतीला पाणी देण्यासाठी साडेसात हॉर्सपॉवरपर्यंतचे कृषिपंप वापरणाऱ्या शेतकऱ्यांना सध्या वीजबिल भरावे लागत नसले, तरी त्यांच्या नावावर पूर्वीची थकीत वीजबिले कायम होती. ही थकबाकी संबंधित शेतकऱ्यांच्या खात्यावर दिसत असल्यामुळे भविष्यात वसुलीची टांगती तलवार कायम होती. तसेच काही प्रकरणांमध्ये नवीन वीजजोडणी घेतानाही या थकबाकीचा अडथळा निर्माण होत असल्याचे मुख्यमंत्री फडणवीस यांनी स्पष्ट केले. आता ही जुनी थकबाकी माफ करण्याचा निर्णय घेतल्याने संबंधित शेतकऱ्यांना दिलासा मिळणार आहे. राज्य सरकारच्या या निर्णयामुळे शेतकऱ्यांच्या डोक्यावरील जुन्या वीजबिलांच्या थकबाकीचे ओझे कमी होणार आहे. कृषिपंपांसाठी मोफत वीज देण्याच्या धोरणासोबतच जुनी थकबाकी माफ करण्याच्या निर्णयामुळे कृषी क्षेत्राला आणखी दिलासा मिळण्याची शक्यता आहे. यापूर्वीही राज्य सरकारने शेतकऱ्यांच्या वीजबिल माफीसंदर्भात निर्णय घेतला होता; आता सुमारे ४८ हजार कोटी रुपयांच्या जुन्या थकीत बिलांबाबतची ही घोषणा महत्त्वाची मानली जात आहे.
