कृष्णा नदीकाठासह मिरज, वाळवा आणि शिराळा तालुक्यांतील पाटबंधारे विभागाच्या अखत्यारितील तलावांवरील उपसा बंदी २८ सप्टेंबरपासून पुढील आदेशापर्यंत शिथिल करण्यात आली आहे. याबाबत सांगली पाटबंधारे विभागाच्या कार्यकारी अभियंत्यांनी महाराष्ट्र राज्य वीज वितरण कंपनीला पत्राद्वारे कळविले आहे. दरम्यान, उपसा बंदी शिथिल करण्यासाठी भाजप नेते शरद लाड यांनी पालकमंत्री चंद्रकांत पाटील यांच्याकडे विनंती करून पाठपुरावा केला होता. त्यानंतर प्रशासनाकडून उपसा बंदी शिथिल करण्याबाबत कार्यवाही करण्यात आली.
कृष्णा नदीतील पाणीपातळी कमी झाल्याच्या पार्श्वभूमीवर सिंचनासाठी पाणी उपसा करण्यावर निर्बंध घालण्यात आले होते. या निर्णयामुळे नदीकाठच्या शेतीसह विविध उपसा सिंचन योजनांवर परिणाम झाला होता. या पार्श्वभूमीवर शेतकऱ्यांच्या अडचणी लक्षात घेऊन उपसा बंदी शिथिल करण्याची मागणी करण्यात येत होती. शरद लाड यांनीही याबाबत पालकमंत्री चंद्रकांत पाटील यांच्याकडे विनंती केली होती. यापूर्वी कृष्णा नदीतील पाणीपातळीचा प्रश्न आणि उपसा सिंचन योजनांच्या अडचणींबाबत लाड यांनी भूमिका मांडली होती.
सांगली पाटबंधारे विभागाने जारी केलेल्या आदेशानुसार कृष्णा नदी मोरजे-अटके, ता. कराड, जि. सातारा येथून को. प. बंधारा डिव्हिजन, ता. मिरजपर्यंतच्या तसेच संबंधित नदीकाठच्या क्षेत्रातील उपसा बंदी शिथिल करण्यात आली आहे. त्याचबरोबर मिरज, वाळवा व शिराळा तालुक्यांतील पाटबंधारे विभागाच्या अखत्यारितील सर्व तलावांनाही या निर्णयाचा लाभ मिळणार आहे.
तसेच मोरणा नदी व त्यावरील को. प. बंधाऱ्याच्या दोन्ही तीरांवरील क्षेत्रातही उपसा बंदी शिथिल करण्यात आली आहे. उपसा सुरू करण्यासाठी आवश्यक विद्युतप्रवाह पूर्ववत करण्याबाबत संबंधित अधिकाऱ्यांनी कार्यवाही करावी, अशा सूचना पाटबंधारे विभागाने दिल्या आहेत.
या निर्णयामुळे मिरज, वाळवा आणि शिराळा तालुक्यांतील शेतकऱ्यांना सिंचनासाठी पाणी उपलब्ध करून घेण्यास काही प्रमाणात दिलासा मिळणार आहे. विशेषतः नदीपात्रातील पाणी उपलब्ध झाल्यानंतर उपसा सिंचन योजनांच्या माध्यमातून शेतीला पाणी देण्याचा मार्ग मोकळा होणार आहे.
मात्र, जत आणि कवठेमहांकाळ तालुक्यांतील सर्व तलावांवरील उपसा बंदी कायम ठेवण्यात आली आहे. या भागातील उपसा बंदीच्या आदेशात कोणताही बदल करण्यात आलेला नसल्याचे पाटबंधारे विभागाने स्पष्ट केले आहे. तलाव भरून घेतल्यानंतर दुष्काळी तालुक्यातील उपसा बंदी उठवण्यात येण्याची शक्यता आहे.
अजून कोणतेही कमेंट्स नाहीत. पहिला कमेंट करा!
