स्वतःचा उद्योग सुरू करायचाय? ‘CMEGP’मधून मिळू शकते 35 टक्क्यांपर्यंत अनुदान

कोल्हापूर : स्वतःचा उद्योग किंवा व्यवसाय सुरू करण्याचे स्वप्न पाहणाऱ्या महाराष्ट्रातील तरुण-तरुणींसाठी राज्य शासनाचा ‘मुख्यमंत्री रोजगार निर्मिती कार्यक्रम’ (CMEGP) महत्त्वाची संधी ठरू शकतो. या योजनेअंतर्गत पात्र लाभार्थ्यांना नवीन उद्योग सुरू करण्यासाठी बँक कर्जासोबत प्रवर्ग आणि क्षेत्रानुसार 15 ते 35 टक्क्यांपर्यंत अनुदानाची तरतूद आहे.

काय आहे CMEGP योजना?

महाराष्ट्रातील युवक-युवतींना स्वयंरोजगाराच्या माध्यमातून आर्थिकदृष्ट्या स्वावलंबी बनविणे हा या योजनेचा प्रमुख उद्देश आहे. 1 ऑगस्ट 2019 पासून या योजनेची अंमलबजावणी सुरू झाली असून अर्ज प्रक्रिया ऑनलाइन आहे. जिल्हा उद्योग केंद्रासह संबंधित यंत्रणांमार्फत योजनेची अंमलबजावणी केली जाते.

किती रकमेचा प्रकल्प करता येणार?

योजनेअंतर्गत उत्पादन उद्योगासाठी कमाल प्रकल्प मर्यादा एक कोटी रुपये, तर सेवा उद्योगासाठी कमाल प्रकल्प मर्यादा 50 लाख रुपये असल्याचे योजनेच्या माहितीत नमूद करण्यात आले आहे. लाभार्थ्याचा प्रवर्ग आणि उद्योगाचे शहरी किंवा ग्रामीण क्षेत्र यानुसार अनुदानाचे प्रमाण 15 ते 35 टक्क्यांपर्यंत असू शकते. विशेष प्रवर्गातील लाभार्थ्यांसाठी 5 टक्के, तर इतर प्रवर्गासाठी 10 टक्के स्वगुंतवणुकीची तरतूद आहे.

कोणाला मिळू शकतो लाभ?

अर्जदाराचे वय किमान 18 वर्षे पूर्ण असणे आवश्यक आहे. दहा लाख रुपयांपेक्षा अधिक प्रकल्प खर्च असलेल्या उत्पादन उद्योगासाठी आणि पाच लाख रुपयांपेक्षा अधिक प्रकल्प खर्च असलेल्या सेवा उद्योगासाठी अर्जदार किमान आठवी उत्तीर्ण असणे आवश्यक आहे. ही योजना नवीन स्थापन होणाऱ्या उद्योगांसाठी असून वैयक्तिक लाभार्थी आणि पात्र बचत गट अर्ज करू शकतात.

कोणते उद्योग करता येऊ शकतात?

उत्पादन क्षेत्रात खाद्यपदार्थ प्रक्रिया, डाळ मिल, ऑइल मिल, दुग्धजन्य पदार्थ, बेकरी, गूळ उत्पादन, मसाले, पॅकेज्ड ड्रिंकिंग वॉटर, पशुखाद्य, रेडिमेड गारमेंट्स, फर्निचर, स्टील फॅब्रिकेशन, शेती अवजारे, प्रिंटिंग, पेपर कप, फळ प्रक्रिया आदी उद्योगांचा विचार करता येतो.

सेवा क्षेत्रात खानावळ, लॉन्ड्री, ब्युटी पार्लर, वाहन दुरुस्ती, संगणक प्रशिक्षण केंद्र, इलेक्ट्रॉनिक उपकरणे दुरुस्ती, झेरॉक्स सेंटर, कुक्कुटपालन, मधमाशीपालन, मत्स्यपालन, होम-स्टे, क्लाउड किचन, फूड ट्रक, केटरिंग, इव्हेंट मॅनेजमेंट, महा ई-सेवा केंद्र आणि डीटीपी जॉब वर्क आदी व्यवसायांचा समावेश होऊ शकतो.

अर्जासाठी ही कागदपत्रे ठेवा तयार

ऑनलाइन अर्जासाठी पासपोर्ट आकाराचा फोटो, आधार कार्ड, जन्म किंवा रहिवासासंबंधी आवश्यक दाखला, शैक्षणिक पात्रता प्रमाणपत्र, हमीपत्र आणि प्रकल्प अहवाल आवश्यक आहे. आरक्षित किंवा विशेष प्रवर्गातील अर्जदारांना संबंधित प्रमाणपत्रेही सादर करावी लागतात.

ऑनलाइन अर्ज कसा कराल?

योजनेसाठी अर्ज ऑनलाइन पद्धतीने करावा लागतो. इच्छुक नवउद्योजकांनी महाराष्ट्र शासनाच्या अधिकृत CMEGP पोर्टलवर अर्ज सादर करावा. अर्ज करण्यापूर्वी योजनेचे अद्ययावत निकष, पात्रता, प्रकल्प मर्यादा आणि अनुदानाची माहिती अधिकृत पोर्टलवर तपासावी. अधिक माहितीसाठी संबंधित जिल्हा उद्योग केंद्राशी संपर्क साधता येईल. ...... जिल्हा उद्योग केंद्र,  कोल्हापूर